Мария Васильевна Андросова — Күн Суһума

 

Таатта улууһун Ытык- Күөлгэ 1958 сыллаахха төрөөбүтэ.  «Дьол утаҕа» диэн бастакы хоһооно 2011 сыллаахха  «Таатта» хаһыакка бэчээттэммитэ. 2015 сыллаахха «Сирдээҕи анал» диэн хоһоонун хомуруунньуга «Уран тыл оһуордаах хонуута» серия  иһинэн  «Таатта» хаһыат редакциятыгар  бэчээттэнэн тахсыбыта. Хоһооннорго олоххо таптал, олоҕу анааран көрүү хоһуйуллаллар. Автор олох тутулугун өйдүүр, ырытар буоларга дьулуһарын хоһоонунан көрдөрөр.

 

Ахтылҕан

Дьэдьэн сыта тунуйбут

Ийэм эргэ ыаҕаһын

Түөспэр ыга кууһаммын

Сыллаан, сыттаан ылабын.

 

Илиилэрин сылааһа

Сонно тута биллиннэ

Сүппэт, ааспат ахтылҕан

Саҥа тыына илгийдэ.

 

Ийэм үөрбүт харахтара

Имэрийэ көрдүлэр,

Сырдык, истиҥ мичээрэ

Таптал тылын эттилэр.

 

Ардылара ыраатан

Ааһан хаалбыт дьыл-хонук

Ааспыт, саспыт ахтылҕан

Саҥа тыынын сахтылар.

 

Олох суолугар.

 

Ахтыбыт эбиппин алааспын

Ача от сытынан дыргыйар салгынын,

Алыптаах сытынан тунуйар түптэтин,

Араҕас сибэкки киэргэппит хонуутун.

 

Ахтыбыт эбиппин алаадьы кэһиилээх

Аараттан үргэммит сибэкки тутуурдаах,

Атастар, доҕоттор мунньустан сэлэһэр

Аар хатыҥ аттыгар көрсүһэр сирбитин.

 

Ахтыбыт эбиппин умайар кутааҕа

Аһатан, алҕатан ас кутан биэрэрбин

Араастаан салаллар бу олох суолугар

Арчылаан, көмүскээн атааран ыытарын.