Григорьев Павел Петрович

 

Таатта улууһун Тыараһа нэһилиэгэр 1959 с. төрөөбүтэ. Эдэр эрдэҕиттэн айар үлэнэн дьарыктанар. Хоһоонноро 1977 с. «Коммунист» кэлин «Таатта», «Кыым» хаһыаттарга бэчээттэммиттэрэ. «Ахтылҕан» диэн хоһооно Иван Сорокоумов мелодиятыгар дьон-сэргэ сөбүлээн ыллыыр ырыатынан буолбута.  «Хардыы» литературнай түмсүү чилиэнэ. Барыта 100 тахса хоһооннордоох.

Ахтылҕан

Санаабар элэҥнээн ааһаллар

Суугунуур күөх тыалар,сыһыылар.

Сүрэхпин долгутан ааһаллар,

Мин дойдум хатыҥнаах чараҥа.

 

Күлүмнээн көһүннэ күөх Таатта

Күндээрэ мэндээрэр долгуна

Кытылга суугунуур хатыҥа

Күөгэйэ нусхайар талаҕа.

 

Аҕынным даҕаны  дьоннорбун,

Сахалыы дьиэрэйэр ырыаны,

Сүрэҕим курдаттыы тартарар

Дойдубар эргиллиэн баҕарар.

 

Наҕыл Таатта

Наҕыл, наҕыл Таатта үрэх

Тоҕо харах уутун курдук

Устаҕыный, бытааннык-

Кыыс ырыатын санатаҥҥын.

 

Сөрүүн сүөгэй уутун курдук

Сөрүүкэтэр буолаҕын.

Хатыҥ чараҥ суугунун

Долгуннаргар санатаҕын.

 

Түптэ унаар буруотунуу,

Кыысчаан уһун суһуоҕунуу

Күлүмүрдүү уста сытар

Ыраата дуу, наҕыл Таатта…

 

Эн көмүс долгуннаргар

Көтөҕүллэн барыа саастарым

Сыламныам сырдык ууларгар,

Көрсүөм…кытылгар кырдьыыны.