Колодезникова Ирина Афанасьевна-Ымыы

(1962-2022)

1962 сыллаахха Алексеевскай оройуонун Тыараһа нэһилиэгэр төрөөбүтэ. 2015 сылтан СӨ суруйааччыларын сойууһун чилиэнэ.

5 хоһоон кинигэтин уонна 1 ырыанньык ааптара. Хоһоонноро «Чолбон», «Күрүлгэн», «Далбар Хотун», «Кистэлэҥ күүс» сурунаалларга, «Кыым», «Туймаада», «Киин куорат», «Таатта» хаһыаттарга бэчээттэммиттэрэ. 2014 сыллаахха «Көтөбүн ырабын батыһа» бастакы хоһоонун хомуруунньуга күн сирин көрбүтэ. 2015 с. Таатта улууһун «Поэзияҕа анал аат» анал аат ылбыта.

Үгүс хоһооно ырыа буолан ылланар. 2017 с. уонна 2021 с. «Үрдэл» национальнай бириэмийэҕэ «Бастыҥ ырыанньык — поэт» анал аат анаммыта.

Тааттабар

Олордум Тааттабар мин үйэм тухары

Эйэҕэс-сайаҕас дьоннорбун кытары.

Кэрэҕэр бигэнэн аһардым сыллары,

Сэргэбин туруортум көлөбүн баайаары.

 

Хайа да дойдуга бардарбын курдары

Ахтаммын кэлэбин кырыскар хаамаары,

Устугас долгуҥҥар умсаахтаан ылаары,

Көҕөрөр кытылгар сыламнаан сытаары.

 

Олус да таптыыбын чэлгийэ тылларгын,

Дьэдьэн, мүөт сытынан дыргыйар тыаларгын,

Өҥ-быйаҥ үрдүнэн тэлээрэр лыахтаргын,

Эбэккэм, уһуктан талбаара устаргын.

 

Төрөөбүт эбиппин мин ырыа ыллаары,

Тапталлаах Тааттабын айхаллыы туойаары,

Тыл көмүс чыычааҕын көҥүлгэ ыытаары,

Дьол- үөрүү чороонун күөрэччи уунаары.

 

 

Төлкөм миэнэ-улуу дьолум

Халтарыйдахпына-халыҥ хаар

Хабан ылар харысхалым,

Күөлэһийдэхпинэ-көмүрүө хаар

Көтөҕөн ылар көмүскэлим.

 

Алларыйдахпына-алаас сирим

Алы гынар абыралым,

Уордайдахпына-уһук дойдум

Уоҕум харыыр уоскулаҥым,

Төрөөбүт дойдум, төрүт буорум,

Төлкөм миэнэ-улуу дьолум.

 

Тоҥор да кэммэр эн тускунан

Тосту-туора тойуктамматаҕым,

Мөлтүүр да кэммэр эйигин аатттаан

Мөкү тылынан мөҥүттүбэтэҕим.

 

Күннээх халлаан анныгар

Күндүргэтэрим эрэ — эн,

Орто дойду олоҕор

Ордорорум эрэ — эн

Төрөөбүт дойдум, төрүт буорум,

Төлкөм миэнэ — улуу дьолум.

 

АХТЫЛҔАН

Таптал ааппын ааттыы, ааттыы,
Аргыый аҕай ыллыы, ыллыы,
Ийэм миигин тарыыр дуу,
Имэрийэн ылар дуу?
Атын эбит, тыал эбит-
Илгэ сайын тыына эбит.

Тутан ылан сыллыы, сыллыы,
Омуннура хайгыы хайгыы,
Ийэм миигин кууһар дуу,
Атаахтатан үөрэр дуу?
Атын эбит, күн эбит-
Уйгу-быйаҥ күүһэ эбит.

Ааһар сирбэр кэтии, кэтии,
Сибэккинэн симии, симии
Ийэм миигин көрсөр дуу,
Сылаанньыта бигиир дуу?
Ити дойдум, кини эрэ
Ийэм курдук таптыыр эбит.

Ымыы.Таатта
17.10.2021с.

САЙЫН КЭЛБИТИНЭН!!!🌿🌺