Литвинцев Максим Иванович

1953-2022

1953 с. Тыараһа нэһилиэгэр төрөөбүтэ. Максим Иванович биир дойдулаахтарыгар бастыҥ баяниһынан, ыраас куоластаах ырыаһытынан, уран тарбахтаах ууһунан, уруһуйдьутунан биллибитин таһынан, нэһилиэк ааспыт историятын, дьонун-сэргэтин үтүө ааттарын үйэтитэр үлэтинэн кэрэхсэнэрэ.

Кини — хомоҕой тыллаах хоһоонньут, самодеятельнай мелодист: «Кыйы вальса», «Аар хатыҥ», «Күөрэгэй» о.д.а. хоһоонноро ырыа буолан ылланаллар. Айымньылара улуус, республика хаһыаттарыгар, «Чолбон» сурунаалга бэчээттэммиттэрэ.

Кыйы вальса

Самаан сайын эргийдэ

Сахам сирин үрдүнэн

Кэрэ кэммит күөрэйдэ,

Кэрэ ырыа дьиэрэйдэ

 

Кыйы күөлүн тулата

Көр ырыанан сатарда,

Таатта үрэх уулара

Күлүмүрдүү долгуйда.

 

Сайдар, үүнэр бу сиргэ

Эдэр ыччат дьоллонор,

Күүстээх кимиэл үлэнэн

Олох суолун оҥорсор.

 

Кыйы күөлүн тулата

Көр ырыана сатарда.

Таатта үрэх барахсан

Талбаарыйа уһунна.

 

Эдэр ыччат, кэлиий дуу

Киэһэ манна Тааттаҕа,

Кэскиллээҕи кэпсэтэ

Иирэ талах быыһыгар.

 

Кыйы күөлүн тулата

Миигин кытта ыллас дуу,

Олох дьолун хоһуйса

Киэһэ манна Тааттаҕа.

10.10.1973 с.

 

 

«Ырыа Бэргэн» — Ньукулай

(Тааттаҕа «Ырыа Бэргэн — 92» ааты ылбыт Николай Варламовка)

 

Бүгүн дьоро киэһэ

Олохтонор Кыйыга.

Ырыа Бэргэн Ньукулай

Ырыа ыһыаҕын төрүттээн,

Тохсунньу тоһуттар тымныыта

Сайыҥҥы киэһэлии мүлүрүйдэ.

Ырыа Бэргэн Ньукулай

Истиҥ тыллаах ырыаларынан

Ырыаттан ырыалар сиэттиһэн

Доллоһуйар сүүрүктүү суккустулар.

Ырыа Бэргэн Ньукулай

Сүрэхпит чопчутун таҕайда.

Халлаан сулуһа үмүөрэн

Түннүк нөҥүө сэргээтэ,

Дойду дьоно дуоһуйан

Дьоро киэһэ сылаанньыйда.

Таптал тыллаах тойуккун

Ыччат дьонум кэтээтэ,

Намылхай нарын ырыаҕыҥ

Аҕам дьонум хайҕаата.

Сүрэҕиҥ киччим иэйиитинэн

Үлэ, олох үөрүүтүн

Олус да истиҥ санаанан

Сайа туойан ыллаатыҥ.

Ырыа Бэргэн Ньукулай

Барыбыт сүрэҕин туттуҥ.

Махтал, баһыыба буолуохтун

Дьоро киэһэ эйиэхэ!

Ырыа-тойук аргыстанан

Олор уһун олоххо

Үөрдээр-көтүтээр бар дьоҥҥун

Үгүс ырыа ыһыаҕынан.

23.01.1993 с.