Солко Туналы Баһылай кыыһа

 1980 сыллаахха Таатта улууһугар  Ытык-Күөлгэ төрөөбүтэ. Айар үлэтэ 2006 сыллаахтан кыралаан саҕаламмыта, дьүккүөрдээхтик 2009 сылтан суруйар. Тыараһаҕа «Хардыы» литературнай түмсүү чилиэнэ. Араас өрөспүүбүлүкэ , улуус иһинэн ыытыллар хоһоон куонкурустарыгар бэйэтин айымньыларынан көхтөөхтүк кыттар. Хоһоонноро «Таатта» хаһыакка, «Чолбон», «Кистэлэҥ күүс» сурунаалларга бэчээттэммитэ.

 

Тыараһа…

Үлэттэн дьоллонор  аналлаах

Көхтөөх сэргэх дьоннордоох

Кыайыы — көтөл кынаттаах

Элэккэй эйэҕэс ыччаттаах

Бу- мин дойдум Тыараһа

Кыйы эбэм туоната!

 

Манна бааллар дьоһуннаах

Бөҕө-таҕа уолаттар

Килбик-нарын бэйэлээх

Кыталык курдук кыргыттар

Бу-мин дойдум Тыараһа

Кыйы эбэм кытыла!

 

Сыһыы аайы сылгы, ынах

Хонуу аайы хойуутун

Уйгу-быйаҥ алааспар

Үрүҥ илгэ кутуллар

Бу-мин дойдум Тыараһа

Кыйы эбэм уйгута!

 

Таатта эбэм сүнньүгэр

Талааннара арыллан

Улуу дьоммут сыдьааннара

Утумнууллар удьуору

Бу-мин дойдум Тыараһа

Кыйы эбэм кылаана!

 

Хомус, тойук, олоҥхо

Кылыһах кырыымпа дорҕооно

Алыптаах тылга тиһиллэн

Үтүө үгэс салҕанар

Бу-мин дойдум Тыараһа

Кыйы эбэм эйгэтэ!

 

Тыгын Дархан саҕаттан

Тыастаах Табык ааттанар

Кэлбит эрэ барыта

Таптаан кутун туттарар

Кыйы эбэм кэскилэ

Бу -мин дойдум Тыараһа !

2014 сыл.

 

****

Таптыыбын үрүҥ түүн дойдубар.

Эбэбэр дьаарбайа киирэрбин.

Биллибэт иэйиигэ куустаран.

Уоскуйан налыйан ыларбын.

Таптыыбын саҥа күн тахсыыта.

Алааспар күүлэйдии хаамарбын.

Күөх сирэм айылҕам хотуҥҥа.

Холкутук туттаммын сылдьарбын.

Таптыыбын ыраахтан ахтаммын.

Тааттабар мин төннө турарбын.

Кыайыылаах кынатын анньынан.

Кыйыбар эргиллэн кэлэрбин.