Чехордуна Екатерина Петровна- Кэчиимэ 

Чехордуна Екатерина Петровна- Кэчиимэ  педагогическай наука кандидата, РСФСР, СР үтүөлээх учуутала, Таатта улууһун, Тыараһа нэһилиэгин бочуоттаах олохтооҕо Тыараһа нэһилиэгэр  1945 сыллаахха төрөөбүтэ.

Мантан аллараа, бэйэтин тылларыттан суруллубуту киллэрэбит: «1962 сылтан саҕалаан, кыра -кыралаан бооччойон, кумааҕыга тэһэ анньар идэлэммитим. Ити идэни олох сөбүлээбэт этим, ол иһин оннук кумааҕылар быраҕыллан испиттэрэ.Онтон дьонум, дойдум ахтылҕана саҥа ырааппыт , дойдутуттан тэлэһийбит уон алталаах эрэ киһини, үүйэ-хаайа тутан барбытыгар, бэрт эрэйинэн хоһооҥҥо маарынныыр туох эрэ тахсыбытын, күннүкпэр «үйэтиппит» эбиппин. Ол кэнниттэн үйэ аҥаара холобурдаах кэмҥэ арыт дөрүн-дөрүн  тэһитэ кэйиэлиир иэйии тыллара анал тэтэрээти ирдиир буолтара» Онон ордон хаалбыт, тиһиллэн кэлбит хоһооннору хомуйан, наардаан 2013 сыллаахха «Иэйэр кутум илгэтэ» диэн ааттаах хоһоон хомуруунньугун бэчээттэппитэ.

 

Арай манна кэлбэтэххэ

Арай манна кэлбэтэххэ,

Алардары көрбөтөххө

Түүнүн түүлбэр хатыҥым

Ыҥыраллар наскылдьыһа.

 

Арай манна кэлбэтэххэ,

Тааттам уутун испэтэххэ,

Өргө диэри аала сылдьар

Курус санаа миигин булар.

 

Арай манна кэлбэтэххэ,

Таптыыр дьоммун көрбөтөххө,

Иэйэр иэйиим муҥатыйар,

Модун санаам иҥэр, сүтэр.

 

Арай манна кэлбэтэххэ,

Кыйым ыраас салгынынан

Эҕирийэ тыымматахха,

Дьолу биллим дэниэ суохпун.

1980 с.

 

Төрөөбүт-үөскээбит Кыйыбар

Орто дойду олоҕор

Олоҥхо хоһуллар

Алаҕаркаан-тэтэгэркээн

Айыы сирэ — мин дойдум.

 

Кылыыҥкайдыыр сүүрүктээх

Кэрэ Кыйым ньууругар

Ыраас үрүҥ сибэкки

Сырдык ууга көрүнэр.

 

Мип-минньигэс сытынан

Дьэдьэн тыаҕа угуйар,

Хап-харанан моонньоҕон

Тэһэ көрөн имнэнэр.

 

Суугунатар солконон

Хатыҥ чараҥ көрсүһэр.

Хойуу талах кытылга

Хоолдьугунан имиллэр.

 

Уоллаах кыыһы уулларар

Таптал мүөттээх тылынан

Ыйдаҥаҕа ыллыыра

Чуумпу Тааттам үрэҕэ.

1994 с.