1 Star2 Stars3 Stars4 Stars5 Stars (No Ratings Yet)
Загрузка...
117 views

Яковлев Дмитрий Дмитриевич- Орулуос

Яковлев Дмитрий Дмитриевич -Орулуос

(1918-1991с.с)

 

Тыараһаҕа төрөөбүтэ. Чурапчытааҕы педучилищеҕа үөрэнэн 1940 с начальнай оскуола учууталын идэтин ылбыта. Училищеҕа үөрэнэ сылдьан литературнай куруһуокка дьарыктанан элбэх хоһоону суруйбута, айар үлэ иккис идэтинэн буолбута. 1939 с. Саха сирин суруйааччыларын 1-кы сьеһигэр кыттыыны ылбыта. Аҕа дойду сэриитин ветерана. Оҕону иитиигэ, үөрэтиигэ Чөркөөххө, Уолбаҕа, Тыараһаҕа 37 сыл үлэлээбитэ. Хаһыат актыыбынай общественнай корреспондена, пропагандист, литературнай куруһуогу тэрийээччи. Кыыһа Н.Д Христофорова аҕатын хоһооннорун түмэн, «Дойду ахтылҕана» диэн хоһооннорун кинигэтин 2011 сыллаахха таһаартарбыта.

 

Кустук

Астан эрэр самыыр аргыый ибиирэ турбута
Мин хатыҥ мастаах аларбар.
Арҕаалаабыт күн быстыбыт былыттан
Мичээрдии көрөн тылбаарытар.

Чуу! Изумруд алар намылыйда.
Оттон илин халлаан эркинэ
Аалай кустук арылыйан,
Солко лиэнтэнэн киэргэннэ.

Кэрэтиэн өндөл халлаан кустуга!
Сис кэтэҕиттэн иэҕиллэн дуҕалыы,
Кыйы күөл түгэҕэр тургуллан турбута
Сэттэ сиэдэрэҋ дьарҕаалыын!
Астан эрэр самыыр аргыый ибиирэ турбута
Барҕарыа холкуоһум уйгута:
Буолаҕа хойуу бурдук буһуоҕа,
Сыһыыга үкэр от торолуйуоҕа!

Талба Таатта

Таатта, Таатта эбэбит
Талыы-талба да эбит
Итии самыыр кустугун
Иэҕэн лиэнтэ оҥостор,
Таалар симэх хонуутун
Тахсар күҥҥэ оонньотор,
Сыһыыларын киэргэлэ-
Сылгы, ынах сүөһүтэ,
Араҥастай арыыта
Аар-саарга аатырда!

Таатта, Таатта эбэбит
Талыы-талба да эбит
Улуу нуучча үөрэҕин
Умсугуйан үтүктэр
Дэриэбинэ кэрэтин
Дэгэтэрин эриэхсит!
Манна дьолу сомсоллор
Баартыйабыт тылынан,
Үксээтилэр хоһуун дьоннор
Илгэ муоратын айсыһан.

Таатта, Таатта эбэбит
Талыы-талба да эбит
Мантан үүммүт салайааччы,
Суруйааччы хомпорууна,
Саамай күүскэ дьиэрэйэр
Манна саха хомуһа.