1 Star2 Stars3 Stars4 Stars5 Stars (No Ratings Yet)
Загрузка...
233 views

Бэлиэ күннэр хоһооннорго

Уйгу-быйаҥ ыһыаҕынан! Биир дойдулаахтарбыт, олохтоох автордар үрүҥ-тунах ыһыахха анаабыт хоһооннорун ааҕыҥ, сэргээҥ!

Өбүгэ үгэһэ -ыһыах.

Дмитрий Яковлев

Кэлиҥ ыһыахха

Хаарыан хампа чэчири
Хаймыыламмыт түһүлгэбит
Биһигини ыҥырда
Бүгүн уйгу ыһыахха.

Онно аалай знамялар
Трибунаттан сапсынаннар
Аас суолбутун кэпсииллэр,
Кэскилбитин эҕэрдэлииллэр.

Саар былааһын саҕана
Самныбыт, торбос таҥастаах
Саха бүгүн ыллыахтаах,
Партияҕа махтанна!

Чэйиҥ! киирин, ыалларбыт,
Кырдьаҕаһы бастатан!
Кэлиҥ, түмсэн, ыраахпыт,
Грузовик аттанан!

Үөһэ уоттаах сулустаах
Трибуна дьогдьойор саалыттан
Москваҕа араапарданыахтаах
Кыайыыларбыт саас сааһынан.

Күн-ый буолбут сирдьиппит-
Көмүс аҕабыт, Ильичпит
Сүдү аатыгар сүгүрүйүөхпүт
Сүһүөхпүтүгэр тураммыт.

Дьэ онтон саҕаланыаҕа
«Дьэргэстэйбит ыһыаҕа»
Саха хомус тардыаҕа,
Нуучча гармошкалыаҕа.

Онно уохтаах кымыспыт
Утахтары ханнарыа.
Эмньик эскэл тыйбыт
Эмис этэ тардыллыа.

Кынаттаах, быһый соноҕос
Көмүс туйаҕа күллүн!
Кылыы туоһугар уол оҕо
Кыыралдьыйан түстүн!

Уонна улахан төбүрүөҥҥэ
Олоҥхобут доллоһуйуо.
Эйээрэр эһиэхэйгэ
Эдэр, эмэҥ долгуйуо.

Чэйиҥ, киириҥ, ыалларбыт,
Кырдьаҕаһы бастатан!
Кэлиҥ, түмсэн, ыраахпыт,
Грузовик аттанан!

Максим Литвинцев

Ыһыах күн

Сайыммыт ситэн силигилээн,
Сиэдэрэй өҥүнэн сырдаата.
Мүөттээх салгын сытынан
Бэс ыйа сайгыйда.

Бүгүн ыһыах күнүгэр
Бары эрдэ турдубут,
Үрдэ суох үөрүүттэн
Үөһэ көтүөх курдукпут.

Оҕо-аймах лыах буолан
Кырдал устун сырыста,
Аҕам дьонум дьоһумсуйан
Түһүлгэ диэки субуста.

Үөрүү-көтүү өрөгөйдөөн
Санаа үөһэ кынаттанна,
Түһүлгэ иһэ күлүмүрдээн
Сайыҥҥы күннүүн силлистэ.

Түһүлгэ томтойор саалыгар
Оһуокай сатарыы дьиэрэйдэ,
Сайын уйгутун уруйдаан
Тойук бастыҥа дуорайда.

Илии-атах оонньуута
Эмэн дьону умсугутта,
Күүстээх, сымса күөн көрсөн
Иэмэх мастыы хатыста.

тунах ыһыах уйгута
Олохтонно субу күн,
Кыынньар кымыс утахпыт
Чороон аайы кутуллан.

2002 с.

Вера Дмитриевна Богатырева

Аҕам сэрииттэн кэлбит үөрүүтэ.

Сэрии бүппүт сураҕа
Алаас аайы иһиллэн,
Аламай күммүт сырдыгынан
Сир дойду киэргэйдэ.

Харамаайы сайылыкка ол сайын
Кыайыы ыһыаҕа буолбута,
Аттаах, сатыы тиэстибитэ
Оһуохай олоҥхо дьиэрэйбитэ

Биэс саастаах тоҥуй кыыс
Аҕабын саҥа көрбүтүм,
Доҕуурга иҥнибит туллуктуу
Сүрэҕим өрүкүйэ үөрбүтэ.

Аҕам кэлбит үөрүүтэ
Дьиэ дьонум малааһына,
Төгүрүк остуол тула
Сэһэн-сэппэн ырааппыта

Сааһыран-олорон саныыбын
Олоҕум умнуллубат түгэнин,
Аҕам ньилбэгэр олордон
Таптыыр ыманныйар үөрүүтүн!

Ирина Колодезникова – Ымыы

Ыһыахха

Сандал ыраас, сырдык күн

Сандаарыйан таҕыста.

Саппаҕыран бүк түспут

Санаам көнөн манньыйда.

Күндүл ыраас халлааным

Күөх урсуна көһүннэ,

Көймөстүбүт санаакам

Көтөҕүллэн таҕыста.

Бүгүн манна үөрүү-дьол,

Хомус тыаһа, оһуохай.

Бүгүн манна үтүө күн –

Ыһыах ыһар дьоро күн!

Оһуо-оһуо-оһуохай,

Ой дуорааннаах оһуохай,

Эһиэ-эһиэ-эһиэхэй,

Энээрийэр эһиэхэй.

Халадаайбыт хайбаҥнаа,

Хаҥас-уҥа буолбахтаа,

Көмүс симэх күлүмнээ,

Түөстэн тэйэн ойуолаа.

Оһуо-оһуо-оһуохай,

Ойор көтөр оһуохай,

Эһиэ-эһиэ-эһиэхэй,
Эрийэ тэбэр эһиэхэй.