🍃 Ыам ыйын 22 күнэ сахаларга улахан суолталаах кэм. Бу кэми кинилэр, кыстыгы этэҥҥэ туораан, саҥа дьылы көрсөр, сайылыкка көһөр күннэринэн ааҕаллара.

Көһүөх иннинэ саха дьоно уоттарын оттон, дьиэ иччитигэр махтаналлара, тэлгэһэлэрин иннин ыраастыыллара.

📝 Сиһилии саламаны ыйыыр, сайылыкка көһүү туомнарын билиһиннэрэбит.

🔅Дьиэ баҕанатыгар хатын сэбирдэҕин кыбытан, хотон аанын иннигэр түптэ уматан, бастыҥ ынахтарын хотонтон таһааран арчылыыллара . Аҕа саастаах киһи, сүөһүлэрэ элбэх үүтү-аһы биэрэ турдуннар диэн алгыс этэрэ.

🔅 Айанныылларыгар эр киһи ойоҕунуун инники бараллар, оҕолор кинилэри батыһаллар. Улаханнык үөрбэккэ, саҥата-иҥэтэ суох көһөллөр. Улаханнык саҥардахтарына, хотон, дьиэ иччитэ соһуйар эбит.

🔅 Дьиэлээх тойон көһөрүгэр сыарҕаҕа тиэйэн баран, бүтэйин ааныгар дэйбииринэн кириэс охсоро.

🔅Сайылыкка титиик аанын аһарыгар дьиэлээх тойон дэйбииринэн кириэс охсор.Оҕолор тоҕус сиргэ түптэ уматаллар.  Титиик иһигэр бастыҥ баҕанаҕа алгыс ото-маһа бэлэмнэнэр.

🔅 Алгыһы ыал аҕата эбэтэр эбээтэ толоруон сөп. Уот оттон баран иччилэртэн көрдөһөн, сылгы сиэлин уматан сыт таһаараллар. Онтон чоҕу ылан хотон ортоку баҕанатыгар эмиэ сыт таһааран ыраастыыллар.

🔅 Ынахтарын титииккэ баайан баран, дьиэлээх тойон дэйбииринэн арчылыыр. Ыал ийэтэ хотон иһигэр саламаны ыйыыр. Титиик баҕанатын таһыгар уот оттон, титиик иччитин алаадьынан , саламаатынан аһатар, итиэннэ төгүрүк хамыйаҕынан суораты баһан ыһар.

🔅Саламаны (дэлбиргэни) саас от-мас тыллыыта, хатыҥ сэбирдэҕэ собо тылын саҕа буоллаҕына ыйыыллар. Сылга биирдэ, элбээбитэ иккитэ, ыйыахха сөп.

🔅Салама ситиитин сылгы сиэлиттэн хаталлар. Уһуна 10,12,17 миэтэрэ буолар. Туостан ынах, ат кырыйаллар, ыаҕайа, томторук оҥороллор.  Салама өрөллөрүгэр маҥан сиэли кыбытыллар, айылҕа биэрбит өҥнөрүнэн таҥас кырадаһыннарын тэҥ гына баайаллар. Хара өҥү туттубаттар.

🔅 Саламаны ыйаан баран алгыс туомун толороллор.

Афанасий Федоров «Саха ыалын сиэрэ-туома» кинигэтиттэн

Барбыт киһии…оҕо сааспар!

Барбыт киһии… оҕо сааспар! Саныыр-ахтар сайылыкпар.
Сүүрбүт-көппүт хонууларбар,
Элэстэммит эниэ сирбэр.

Барбыт киһии… оҕо сааспар!
Лыаҕы тутар кырдалларбар,
Сибэккилиир сыһыыларбар,
Чомполоммут көлүччэбэр.

Барбыт киһии…оҕо сааспар!
Чараас сиидэс ырбаахыбар,
Тэлээрэхтээн тэлэ түһэр,
Моҕотойдуур ойуурдарбар.

Барбыт киһии…оҕо сааспар!
Эрэһиинэ мээчик тэбэр,
Лапта охсон көтө-дайар,
Куота көтөн сүүрбүт сирбэр…

Барбыт киһии…оҕо сааспар!
Тэрэпиискэ лиэнтэлэнэр,
Эрбэйбит баттахтаах кэммэр,
Олооччулаах ойор күммэр…

Барбыт киһии… оҕо сааспар!
Ынаҕы үүрэн үөгүлүүр,
Бостуук сайдыыр саҥатыгар,
Дуораһытар дуорааныгар.

Барбыт киһии…оҕо сааспар!
Сүөһү-сылгы тула мунньар,
Түптэ унаар буруо сыппар,
Сайылыгым налыытыгар.

Барбыт киһии…оҕо сааспар!
Сөрүүн титиик хотоммор,
Кыра талах олоппоспор,
Ынах ыаспыт ыраах ыырбар.

Самаан сайын үгэнигэр,
Балаҕаннаах күрүөтүгэр.
Күлүм күннээх күөх сирэмигэр,
Кырачаан кыысчаан буоламмын-
Күөлэһийэ… төкүнүйэ!…

2023 сыл
Нам.
Чэлгийээнэ.